Аьхкенан догIа

ИСМАИЛОВ Абу

Аьхкенан догIа

Юха а карийна бицбелла могIа,

Бераллин урамехь уьдуш ву со…

ЦIеххьана долало аьхкенан догIа,

Дагахь а доццушехь вашаво цо.

Уьду со бер санна, Iаьмнаш чу лелхаш,

Iаламан беркато цIандина дог.

Ткъа стигал? Стигал ю суна

                                   тIе йоьлхуш.

ХIун бала бу-техьа балхориг цо?

Обновлено 15.10.2018 15:57 | Автор: Administrator 15.10.2018 15:54

«ЦIазамех а догIу цIий, лазийча…»

Магомаева Марем

«ЦIазамех а догIу цIий, лазийча…»

– Баба! Ахь, цхьамма олу-кх сох ПетIамат, – елакъежа, йоккхачу стагана уллехь, лохачу гIантахь хиъна Iа жима йоI. – Кхечара – Фатима, Фатима, Фатима…

         Цхьа хаза догIучу, жимачу, дагна хьаам беш, ловзуш Iеначу шовданах тарло цунна Бабас и цIе йоккхуш.

– ПетIамат... Мел хаза ю-кх хьан цIе! Бабига кхечу кепара ца алало. Къан ма елла со хIинца. Далла дуьхьалйоьду хан ю сан.

Фатимина хаьа, Веза-Воккхачу Дaлa, цкъацкъа, адамаш Ша волчу дIадуьгий. Делахь а Баба дIаяхийта-м ца лаьа цунна.

– Со а яийтахьа хьайца! – боху цо, – суна а лаьа хьоьца хила.

Обновлено 03.10.2018 05:27 | Автор: Administrator 03.10.2018 05:26

Ден доттагI

БЕКСУЛТАНОВ Муса

Дикка хан ю со гIалахь Iашволу, ткъа-ткъе итт шо-м хIетте а ду, институт чекхъяьккхинчул тIаьхьа, болх нисбаларх, кхузахь иштта дIависина. Сих-сиха юрта вахар а ца нисло, цхьана воне-дикане бен, дукха хьолахь – вонехь а хуьлуш.

Нана реза ца хуьлу.

Нана юьртахь Iаш ю, жимахволчу вешица.

Да тхан хьалххехь кхелхинера, нах Казахстанера цIа а бахкале, долу лазар а кхетта.

ЦIадахкар-м дагадогIу суна шера – со ялх шо кхочуш вара.

ВорхI шо кхаьчча ишколе а вахара цIахь – Нохчийчохь, – хьалхарчу классе.

Обновлено 03.10.2018 05:26 | Автор: Administrator 03.10.2018 05:23

Ромеой, «Джульеттий»

АХМАТУКАЕВ Адам

Чоьхьаваьлча, шина даггахь неӀарехь сецира хӀара: шен хенара я шел воккхох хеталун цхьаъ мукъне а цу чохь хилахь, соцур ша, ца хилахь – юхаваьр, аьлла.

Шейк бохучу хелхаран чарп яра, «Бони-М» тобанан эшаран мукъамехь, чоь яьккхина, ийалуш. Ӏаьржачу буьйсано седарчех дуьззина бога хӀокху чу Ӏанийна хоьтуьйтуш, бӀагорехь санна, сирла ӀиндагӀаш дӀасауьдура чухула: пенийн бохалла а, тхов тӀехь шершаш а, хелхарехь болчеран догӀмашна тӀехула а.

Хелхаро шовкъ яийтинарг гонна юккъе волура, шена дуьхьала болчарна – лата санна – чухьодуш; тӀаккха, цигахь жимма чинк йоккхуш я ца йоккхуш, цӀеххьана юхавоьрзура, гонна юкъахь гуо хьовзош, я ша хиллачу метте юхавогӀуш.

Обновлено 03.10.2018 05:23 | Автор: Administrator 03.10.2018 05:14